برازیل: نارنجی مینڈک کی نئی قسم دریافت

سائنس دانوں نے برازیل میں نارنجی رنگ کے ایک نہایت چھوٹے مینڈک کی نئی قسم دریافت کی ہے جو اپنے انتہائی مختصر سائز کے باعث پینسل کی نوک پر باآسانی سما سکتا ہے۔

تحقیق کے مطابق اس مینڈک کا سائز 14 ملی میٹر سے بھی کم ہے اور یہ برازیل کے پہاڑی سلسلے سیرا ڈو کوئریری میں واقع کلاؤڈ فاریسٹ میں پایا گیا ہے۔ ماہرین نے اس نئی قسم کا نام برازیل کے صدر کے نام پر ’بریکیسفیلس لیولائی‘ رکھا ہے۔

کلاؤڈ فاریسٹس عام طور پر سطح سمندر سے 1000 سے 2500 میٹر کی بلندی پر موجود ہوتے ہیں، جہاں پورا سال بادلوں کی ایک تہہ چھائی رہتی ہے اور نمی کا تناسب زیادہ ہوتا ہے، جو نایاب جانداروں کے لیے موزوں ماحول فراہم کرتا ہے۔

واضح رہے کہ اب تک دنیا میں تقریباً 20 لاکھ جانوروں کی اقسام دریافت کی جا چکی ہیں، جبکہ ماہرین کے اندازے کے مطابق زمین پر تقریباً 80 لاکھ جانوروں کی اقسام موجود ہیں۔ اس طرح تقریباً 60 لاکھ اقسام کی دریافت ابھی باقی ہے، جو حیاتیاتی تنوع کی وسعت کو ظاہر کرتی ہے