کراچی ائیرپورٹ پر ایک افسر چوہے پکڑنے کی ڈیوٹی پر تعینات

جناح انٹرنیشنل ایئرپورٹ پر انتظامی امور کے تحت ایک انوکھا فیصلہ سامنے آیا ہے، جس کے مطابق ایک افسر کو سیوریج، بیت الخلاؤں کی صفائی اور چوہے پکڑنے کی ذمہ داریاں سونپ دی گئی ہیں۔

ذرائع کے مطابق اے ایس آئی منور کو بطور انچارج ایڈمنسٹریشن صفائی، چوہے پکڑنے اور سیوریج مینٹیننس تعینات کر دیا گیا ہے۔ انہیں ایئرپورٹ کے واش رومز کی صفائی ستھرائی کی صورتحال پر ہر ایک گھنٹے بعد رپورٹ تیار کرنے کی ذمہ داری بھی دی گئی ہے۔

مزید بتایا گیا ہے کہ اے ایس آئی منور سیوریج لائنوں میں چوہوں اور کیڑوں کے خاتمے سے متعلق اقدامات کی نگرانی بھی کریں گے، یہ تمام امور پاکستان ائرپورٹس اتھارٹی کی معاونت سے انجام دیے جائیں گے۔

ذرائع کے مطابق منور مہدی کے خلاف ایک انکوائری میں سفارش کی گئی تھی کہ انہیں کسی بھی امیگریشن چیک پوسٹ پر تعینات نہ کیا جائے، جس کے بعد مذکورہ سفارش کی روشنی میں انہیں ڈی ڈی آفس میں بطور انچارج ایڈمنسٹریشن تعینات کیا گیا ہے۔

اس فیصلے نے ایئرپورٹ انتظامیہ کے حلقوں میں بحث کو جنم دے دیا ہے اور اسے انتظامی سطح پر ایک غیر معمولی اقدام قرار دیا جا رہا ہے۔