شوہر نے شک کی بنیاد پر بیوی کو بچوں کے سامنے آگ لگا دی

بھارت کی ریاست تلنگانہ کے شہر حیدرآباد دکن میں گھریلو تشدد کا ایک دل دہلا دینے والا واقعہ پیش آیا، جہاں شوہر نے مبینہ طور پر بے وفائی کے شبہے میں اپنی اہلیہ کو آگ لگا کر قتل کر دیا۔

بھارتی میڈیا رپورٹس کے مطابق ملزم وینکٹیش کو اپنی اہلیہ تروینی کے کردار پر شک تھا، جس کے باعث میاں بیوی کے درمیان آئے روز جھگڑے رہتے تھے۔ واقعے کی رات بھی دونوں کے درمیان اسی نوعیت کا تنازع ہوا، جس کے بعد ملزم نے انتہائی سنگین اقدام کرتے ہوئے بیوی پر پیٹرول چھڑک کر اسے آگ لگا دی۔

پولیس کے مطابق خاتون شدید جھلسنے کے باعث موقع پر ہی بے ہوش ہوگئیں، جنہیں فوری طور پر قریبی اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گئیں۔ پولیس کا کہنا ہے کہ واقعے کے وقت جوڑے کے کم سن بچے بھی گھر میں موجود تھے، جن میں سے ایک بچے کے شور مچانے پر پڑوسیوں کو اطلاع ملی۔

اطلاع ملنے پر پولیس نے فوری کارروائی کرتے ہوئے ملزم کو گرفتار کر لیا اور اس کے خلاف قتل کا مقدمہ درج کر کے تفتیش شروع کر دی ہے۔ ابتدائی تحقیقات میں سامنے آیا ہے کہ مقتولہ نے بے وفائی کے الزامات کو مسترد کیا تھا، تاہم ملزم شدید شک و شبہات میں مبتلا تھا۔

پولیس حکام کا کہنا ہے کہ واقعے کی مکمل تحقیقات جاری ہیں اور ملزم کو قانون کے مطابق سخت سزا دلوانے کے لیے شواہد اکٹھے کیے جا رہے ہیں۔