چلتی ٹرین سے گرنے والی خاتون کو ریلوے اہلکار نے بچالیا، ویڈیو وائرل

سماجی رابطے کی ویب سائٹ ایکس پر ایک ویڈیو تیزی سے وائرل ہو رہی ہے، جس میں دیکھا جا سکتا ہے کہ چلتی ٹرین سے ایک خاتون مسافر پلیٹ فارم پر گرنے کے قریب پہنچ جاتی ہیں، تاہم عین وقت پر ریلوے اہلکار کی حاضر دماغی نے ایک بڑے حادثے کو ٹال دیا۔

یہ واقعہ بھارتی ریاست تمل ناڈو کے شہر تمبارم ریلوے اسٹیشن پر پیش آیا، جہاں ایک خاتون مسافر روانہ ہوتی لوکل ٹرین میں سوار ہونے کی کوشش کر رہی تھیں۔ اسی دوران ٹرین نے رفتار پکڑ لی اور خاتون توازن کھو بیٹھیں۔ اس نازک لمحے پر ڈیوٹی پر موجود ٹکٹ چیکنگ اسٹاف نتیش کمار نے فوری ردِعمل دیتے ہوئے خاتون کو بازو سے پکڑ کر محفوظ مقام پر کھینچ لیا، یوں ان کی جان بچ گئی۔

واقعے کی ویڈیو منظرِ عام پر آتے ہی سوشل میڈیا صارفین نے ریلوے اہلکار کے اقدام کو سراہتے ہوئے اسے ’’ہیرو والا کارنامہ‘‘ اور ’’دل دہلا دینے والا لمحہ‘‘ قرار دیا۔ کئی صارفین نے نتیش کمار کی مستعدی اور فرض شناسی کو خراجِ تحسین پیش کیا۔

ریلوے حکام نے بھی سوشل میڈیا پلیٹ فارم ایکس پر واقعے کی تفصیلات شیئر کرتے ہوئے نتیش کمار کی حاضر دماغی اور مسافروں کی سلامتی کے لیے غیر معمولی لگن کی تعریف کی اور اسے فرض شناسی کی شاندار مثال قرار دیا۔

تاہم بعض صارفین نے اس واقعے کے تناظر میں ریلوے نظام میں بہتری کی ضرورت پر بھی زور دیا۔ کچھ تبصروں میں مضافاتی ٹرینوں میں خودکار دروازے بند ہونے کا نظام متعارف کرانے کا مطالبہ کیا گیا، جبکہ دیگر نے پلیٹ فارم اور ٹرین کے درمیان خطرناک خلا کی نشاندہی کرتے ہوئے بنیادی ڈیزائن میں اصلاحات کو ناگزیر قرار دیا۔