بھارت نے اپنی سب سے بھاری سیٹلائٹ لانچ کردی

بھارت کی خلائی ایجنسی انڈین اسپیس ریسرچ آرگنائزیشن (اسرو) نے اپنی تاریخ کی سب سے بھاری سیٹلائٹ کامیابی سے لانچ کر دی۔ اسرو کے مطابق یہ بھارتی سرزمین سے خلا میں بھیجا جانے والا سب سے بھاری پے لوڈ ہے۔

LVM3-M6 راکٹ کے ذریعے امریکی ساختہ AST SpaceMobile کمیونیکیشن سیٹلائٹ کو زمین کے لو ارتھ آربٹ میں پہنچایا گیا۔ سیٹلائٹ کا وزن 6 ہزار 100 کلوگرام ہے، جو اس لانچ کو بھارت کے خلائی پروگرام میں ایک اہم سنگِ میل قرار دیتا ہے۔

اسرو کا کہنا ہے کہ یہ کامیاب لانچ بھارت کے کم لاگت خلائی پروگرام کو مزید فروغ دے گا، جس کے تحت مستقبل میں بغیر کریو مداری مشن اور انسانی خلائی پرواز کے منصوبے شامل ہیں۔ بھارت تیزی سے بڑھتے ہوئے تجارتی سیٹلائٹ کاروبار میں بھی نمایاں حصہ حاصل کرنے کی کوشش کر رہا ہے، کیونکہ فون، انٹرنیٹ اور دیگر مواصلاتی کمپنیاں جدید اور وسیع نیٹ ورک کی تلاش میں ہیں۔

بھارتی حکام کے مطابق بھارت 2027 میں پہلی انسانی خلائی پرواز سے قبل ایک بغیر کریو مداری مشن لانچ کرنے کا ارادہ رکھتا ہے، جبکہ وزیراعظم نریندر مودی 2040 تک چاند پر خلاباز بھیجنے کے منصوبے کا اعلان بھی کر چکے ہیں۔

واضح رہے کہ رواں سال کے آغاز میں اسرو نے CMS-03 مواصلاتی سیٹلائٹ بھی لانچ کیا تھا، جس کا وزن تقریباً 4 ہزار 410 کلوگرام تھا۔