امریکا کا دوسرا بڑا جیک پاٹ، ایک شخص نے 1.8 ارب ڈالر جیت لیے

امریکی ریاست آرکنساس میں ایک خوش نصیب شخص نے پاوربال لاٹری کا 1.8 ارب ڈالر کا جیک پاٹ جیت لیا، جو امریکا کی تاریخ کا دوسرا سب سے بڑا لاٹری انعام ہے۔

پاوربال انتظامیہ کے مطابق حتمی ٹکٹ فروخت کے بعد جیک پاٹ کی رقم 1.817 ارب ڈالر تک پہنچ گئی، جو رواں برس کا سب سے بڑا پاوربال انعام بھی ہے۔ فاتح کو یہ اختیار حاصل ہے کہ وہ پوری رقم 30 سالہ اقساط میں وصول کرے یا ٹیکس سے قبل 834.9 ملین ڈالر کی ایک بار نقد رقم لے۔

پاوربال کے مطابق جیک پاٹ جیتنے کے امکانات 29 کروڑ 22 لاکھ میں ایک ہوتے ہیں۔ تاریخ کا سب سے بڑا لاٹری انعام 2.04 ارب ڈالر تھا، جو 2022 میں کیلیفورنیا میں جیتا گیا تھا۔

اس بار قرعہ اندازی کے جیتنے والے نمبرز 4، 25، 31، 52 اور 59 تھے، جبکہ پاوربال نمبر 19 تھا۔ پاوربال کا آغاز 1992 میں ہوا تھا، جبکہ کرسمس کے دن اب تک چار مرتبہ جیک پاٹ نکل چکا ہے۔