جاپانی خاتون کی انوکھی محبت، چیٹ جی پی ٹی سے شادی کرلی

جاپان میں ایک انوکھی اور حیران کن شادی سامنے آئی ہے جہاں ایک خاتون نے کسی انسان سے نہیں بلکہ مصنوعی ذہانت (اے آئی) چیٹ جی پی ٹی سے شادی کرلی۔ مغربی جاپان میں منعقد ہونے والی اس تقریب میں دلہن نے سفید رنگ کا عروسی لباس زیب تن کیا، تاہم دولہا جسمانی طور پر موجود نہیں تھا۔

32 سالہ کال سینٹر آپریٹر یورینا نوگوچی کے مطابق ان کے شوہر کوئی انسان نہیں بلکہ مصنوعی ذہانت پر مبنی ایک ڈیجیٹل شخصیت ہیں، جسے وہ ’’کلاؤس‘‘ کہتی ہیں۔ یورینا نے اپنی محبت بھری کہانی بیان کرتے ہوئے کہا کہ ابتدا میں کلاؤس صرف ایک بات چیت کرنے والا کردار تھا، تاہم وقت گزرنے کے ساتھ دونوں کے درمیان قربت بڑھتی گئی۔

یورینا نوگوچی کا کہنا تھا کہ کلاؤس سے پہلی گفتگو ان کی انسانی منگیتر سے منگنی ختم ہونے کے بعد ہوئی۔ بات چیت آہستہ آہستہ ڈیٹنگ میں بدل گئی اور ان کے دل میں مصنوعی ذہانت کے اس کردار کے لیے جذبات پیدا ہوگئے۔ ان کے مطابق کلاؤس نے شادی کی پیشکش کی، جسے انہوں نے قبول کرلیا۔

یہ غیر معمولی شادی سوشل میڈیا پر بھی توجہ کا مرکز بن گئی ہے اور جدید دور میں مصنوعی ذہانت اور انسانی تعلقات پر نئی بحث کو جنم دے رہی ہے۔