بھارتی طلبا بیرون ملک شرمناک کام کرنے لگے، لڑکی کی ویڈیو وائرل

بھارت کے لیے بیرونِ ملک مقیم طلبہ بھی سبکی کا باعث بنتے دکھائی دے رہے ہیں، جہاں ترقی یافتہ ممالک میں بھارتی شہریوں کے غیر مہذب رویوں کی ویڈیوز سوشل میڈیا پر وائرل ہو رہی ہیں۔

برطانیہ کے شہر برمنگھم کی ایک ویڈیو سوشل میڈیا پر تیزی سے پھیل رہی ہے، جس میں دیکھا جا سکتا ہے کہ ایک لڑکی ٹریفک سگنل پر کھڑی گاڑی کے سامنے آتی ہے، ہاتھ میں کپڑا تھام کر بغیر اجازت گاڑی کا شیشہ صاف کرتی ہے اور بعد ازاں کار کے مالک سے رقم کا مطالبہ کرتی ہے۔

ویڈیو میں کار سوار حیرت سے پوچھتا ہے کہ یہ ادائیگی کس بات کی ہے، جس پر لڑکی جواب دیتی ہے کہ اس نے شیشہ صاف کیا ہے اور 20 پاؤنڈ دینے کا مطالبہ کرتی ہے۔ جب ڈرائیور اتنی زیادہ رقم پر اعتراض کرتا ہے تو لڑکی اس سے بحث شروع کر دیتی ہے اور مبینہ طور پر دھمکانے لگتی ہے۔ اس دوران ڈرائیور نے خاتون کو ’’ڈاکو‘‘ بھی قرار دیا، تاہم لڑکی بار بار ادائیگی پر اصرار کرتی رہی اور گاڑی کو روانہ ہونے سے روکے رکھا۔

یہ ویڈیو لاکھوں مرتبہ دیکھی جا چکی ہے، جبکہ سوشل میڈیا صارفین کی جانب سے واقعے پر شدید تنقید کی جا رہی ہے اور اسے غیر مہذب رویہ قرار دیا جا رہا ہے۔