لاس اینجلس اولمپکس 2028، ایتھلیٹکس کے کوالیفکیشن سسٹم کا اعلان کردیا گیا

ورلڈ ایتھلیٹکس نے لاس اینجلس اولمپکس 2028ء کے لیے باضابطہ کوالیفکیشن کا نظام اور اہلیت کے لیے نیا معیار جاری کر دیا ہے۔

تفصیلات کے مطابق لاس اینجلس اولمپکس 15 سے 30 جولائی 2028ء تک امریکہ میں منعقد ہوں گے، جن میں ایتھلیٹکس کے مردوں اور خواتین کے 23، 23 جبکہ 2 مکسڈ ایونٹس شامل کیے گئے ہیں۔ اس بار کی اہم بات یہ ہے کہ 4 ضرب 100 میٹر مکسڈ ریلے ریس کو پہلی بار اولمپکس مقابلوں کا حصہ بنایا جا رہا ہے۔

ورلڈ ایتھلیٹکس کی جانب سے جاری کردہ قواعد کے مطابق اولمپکس کے لیے 40 فیصد ایتھلیٹس مقررہ ڈائریکٹ کوالیفائنگ معیار کے ذریعے منتخب ہوں گے، جبکہ بقایا 60 فیصد کھلاڑی عالمی رینکنگ کی بنیاد پر اولمپکس میں جگہ بنائیں گے۔ ورلڈ ایتھلیٹکس نے مزید وضاحت کی ہے کہ صرف مقررہ کوالیفائنگ معیار حاصل کرنا ہی اولمپکس میں حتمی شرکت کی ضمانت نہیں ہوگا بلکہ متعلقہ کوٹہ اور رینکنگ کا اطلاق بھی لاگو ہوگا۔