چھوٹے صوبوں کا قیام قومی ضرورت، عوام کے بنیادی مسائل حل ہوں گے: شوکت یوسفزئی

پاکستان تحریک انصاف (پی ٹی آئی) کے سینئر رہنما شوکت یوسفزئی نے کہا ہے کہ ملک میں چھوٹے اور نئے صوبوں کا قیام ایک اہم قومی ضرورت ہے، جس سے عوام کے بنیادی مسائل ان کی دہلیز پر حل کرنے میں مدد ملے گی۔

میڈیا سے گفتگو کرتے ہوئے شوکت یوسفزئی نے کہا کہ نئے صوبوں کی تشکیل پاکستان تحریک انصاف کے بنیادی منشور کا حصہ ہے اور پارٹی اصولی طور پر اس کی مکمل حمایت کرتی ہے، تاہم اس عمل کے لیے تمام آئینی تقاضے پورے کیے جانے چاہئیں۔ انہوں نے انکشاف کیا کہ حکومت نے نئے صوبوں کے معاملے پر ابھی تک تحریک انصاف سے کوئی باضابطہ رابطہ یا مشاورت نہیں کی ہے۔

پی ٹی آئی رہنما نے پارٹی کے اندرونی اور قومی سیاست کے حوالے سے زور دیا کہ باہمی لڑائی جھگڑے ختم کر کے مفاہمت کا راستہ اپنایا جانا چاہیے۔ ان کا مزید کہنا تھا کہ ریاستی اداروں سے تصادم اور لڑائی کا کوئی فائدہ نہیں ہے اور تمام سیاسی و قومی مسائل کا حل پارلیمنٹ کے فورم سے ہی ممکن ہے۔