بال ٹیمپرنگ اسکینڈل پر ڈیوڈ وارنر کا بیان سامنے آگیا

2018ء کے کیپ ٹاؤن بال ٹیمپرنگ اسکینڈل پر عثمان خواجہ کی سوانح عمری میں کیے گئے سنسنی خیز انکشافات کے بعد سابق آسٹریلوی اوپنر ڈیوڈ وارنر نے بھی سوشل میڈیا پر ویڈیو جاری کرتے ہوئے مکمل سچائی سامنے لانے کا مطالبہ کیا ہے۔ ڈیوڈ وارنر نے عثمان خواجہ کے موقف کی 100 فیصد تائید کرتے ہوئے کہا کہ اس واقعے سے پوری ٹیم واقف تھی اور تحقیقات کے نام پر صرف چند کھلاڑیوں کو نشانہ بنانا شدید ناانصافی تھی۔ انہوں نے کرکٹ آسٹریلیا کی تحقیقات پر سوال اٹھاتے ہوئے کہا کہ ڈریسنگ روم میں موجود دیگر کھلاڑیوں سے پوچھ گچھ نہ کرنا حیران کن تھا، اور اب وقت آ گیا ہے کہ کسی فردِ واحد کو ملامت کرنے کے بجائے اس معاملے کے ذمہ داروں سے احتساب و شفافیت کے تحت جواب طلب کیا جائے۔ ڈیوڈ وارنر نے عثمان خواجہ کا شکریہ ادا کرتے ہوئے کہا کہ 8 سال سے میڈیا پر چلنے والی غلط خبروں اور خاموشی کے بعد بالآخر حقائق منظرِ عام پر آ گئے ہیں، جو ان کے، اسٹیو اسمتھ اور کیمرون بینکرافٹ کے اہل خانہ کے لیے ریلیف کا باعث ہے۔