یوریشیا میں سلامتی کا نیا نظام قائم کرنا ضروری ہے، روسی وزیر خارجہ

روسی وزیر خارجہ سرگئی لاوروف نے کہا ہے کہ یوریشیا میں مساوات اور ناقابلِ تقسیم سلامتی کے اصولوں پر مبنی ایک نیا علاقائی سلامتی نظام تشکیل دینا وقت کی اہم ضرورت ہے، جس میں براعظم کے تمام ممالک کو برابری کی بنیاد پر تعمیری تعاون کے مواقع میسر آسکیں۔

ماسکو میں اجتماعی سلامتی معاہدہ تنظیم (CSTO) کے وزرائے خارجہ، وزرائے دفاع اور سلامتی کونسلوں کے سیکریٹریوں کے مشترکہ اجلاس سے خطاب کرتے ہوئے سرگئی لاوروف نے کہا کہ روس اپنی صدارت کے دوران ایک آزاد، کثیر قطبی اور جمہوری عالمی نظام کے قیام کے لیے کوششیں کر رہا ہے۔ انہوں نے واضح کیا کہ ماسکو میں جاری بین الاقوامی فورم اور مشاورت کے نتائج خطے میں پائیدار امن، روایتی و نئے سیکیورٹی چیلنجز سے نمٹنے اور کثیر قطبی دنیا کی بنیاد رکھنے میں نمایاں کردار ادا کریں گے۔

روسی وزیر خارجہ نے اعلان کیا کہ 11 نومبر کو تنظیم کی ‘اجتماعی سلامتی کونسل’ کا سربراہی اجلاس منعقد ہو رہا ہے، جس میں صدر ولادیمیر پوتن اور دیگر رکن ممالک کے سربراہانِ مملکت تیار کردہ اہم دستاویزات، فیصلوں کے مسودوں اور سالانہ کارکردگی کا جائزہ لے کر حتمی منظوری دیں گے۔ واضح رہے کہ CSTO روس، بیلاروس، قازقستان، کرغزستان، تاجکستان اور آرمینیا پر مشتمل ہے، تاہم آرمینیا نے اس وقت اپنی شرکت معطل کر رکھی ہے