شارجہ: بچوں کو ماحولیات اور شہری ذمہ داریوں سے آگاہی کیلئے 3 منفرد کتابیں متعارف

شارجہ انٹرنیشنل بک فیئر کے 45ویں ایڈیشن میں بچوں کے لیے 3 نئی تصویری کتابوں کی باضابطہ رونمائی کی گئی ہے، جن کا مقصد کم عمر قارئین کو ماحولیاتی تحفظ، شہری ذمہ داریوں اور معاشرتی تعاون کی اہمیت سے روشناس کرانا ہے۔

ایکسپو سینٹر شارجہ میں منعقدہ تقریب میں شارجہ کے نائب حکمران شیخ ڈاکٹر سلطان بن احمد القاسمی اور کلمات گروپ کی بانی شیخہ بدور بنت سلطان القاسمی نے خصوصی شرکت کی۔ کلمات گروپ اور دبا الحصن بلدیہ کے اشتراک سے عربی اور انگریزی زبانوں میں شائع کردہ ’’فرینڈز آف دبا الحصن میونسپلٹی‘‘ نامی اس سلسلے میں مریم الجمال کی کتاب ’’دادا سعید کی لائبریری‘‘، نورہ الخوری کی ’’ساحل کے محافظ‘‘ اور نادیہ النجار کی ’’مریم کا ننھا کھجور کا درخت‘‘ شامل ہیں۔

ان کتب میں دو بچوں راشد، مریم اور ان کے دادا سعید کی کہانیوں کے ذریعے 6 سے 9 سال کے بچوں کو تعمیراتی ضوابط، ساحلی و سمندری حیات کی صفائی اور شجرکاری سے متعلق معلومات فراہم کی گئی ہیں۔ تقریب میں اماراتی وزیر ثقافت شیخ سالم بن خالد القاسمی سمیت متعدد اعلیٰ شخصیات نے شرکت کی، جبکہ نمائش کے دوران بچوں کے لیے مصنفین سے ملاقات اور آٹوگراف سیشنز کا بھی اہتمام کیا گیا ہے۔