شارجہ بک فیئر میں سائنسی تجربات کا مظاہرہ، عبداللہ عنان نے شائقین کو حیران کر دیا

شارجہ انٹرنیشنل بک فیئر کے 45ویں ایڈیشن میں معروف عرب یوٹیوبر اور سائنسی پروگرام ’’شارع العلوم‘‘ کے میزبان عبداللہ عنان نے حیرت انگیز عملی سائنسی تجربات سے شائقین اور بچوں کی بڑی تعداد کو سحر انگیز کر دیا۔

’’ناممکن یا سائنس؟‘‘ کے عنوان سے منعقدہ اس خصوصی شو کے دوران آگ، روشنی، مائع نائٹروجن (منفی 196 ڈگری سینٹی گریڈ) اور کیمیائی تعاملات کے عملی مظاہرے پیش کیے گئے، جنہوں نے کتاب میلے کے مرکزی اسٹیج کو ایک جدید سائنسی تجربہ گاہ میں تبدیل کر دیا۔ سوشل میڈیا پر 1 کروڑ 80 لاکھ سے زائد فالوورز رکھنے والے عبداللہ عنان نے بصری دھوکے، ہائیڈروجن گیس کے کنٹرول شدہ دھماکوں اور مشہور ’’ایلیفنٹ ٹوتھ پیسٹ‘‘ تجربے کے ذریعے بچوں کو سمجھایا کہ بظاہر ناممکن دکھائی دینے والے مناظر کے پیچھے قابلِ فہم سائنسی اصول کارفرما ہوتے ہیں۔

عبداللہ عنان نے بچوں اور والدین کو سخت تنبیہ کی کہ کیمیائی مادوں، گیس اور آگ کے ایسے تجربات گھروں میں ہرگز دہرانے کی کوشش نہ کی جائے کیونکہ یہ مظاہرے پیشہ ور ماہرین کی دیکھ بھال میں کیے جاتے ہیں۔ تقریب کے اختتام پر انہوں نے شارجہ کے بچوں کی سائنس میں دلچسپی اور سیکھنے کے جذبے کی تعریف کی