چڑیا گھر سے 2 شیر فرار ہونے کی افواہ، اے آئی تصویر نے امریکا میں ہلچل مچا دی

امریکا میں مصنوعی ذہانت (اے آئی) سے تیار کردہ ایک جعلی تصویر نے ایسا خوف و ہراس پھیلایا کہ شہریوں کو چڑیا گھر سے دو خطرناک شیروں کے فرار ہونے کی اطلاعات ملنے لگیں، تاہم تحقیقات کے بعد یہ پورا معاملہ محض ایک افواہ ثابت ہوا۔

امریکی ریاست اوہائیو کے شہر ‘اکرون’ کے چڑیا گھر (Akron Zoo) کی انتظامیہ نے سوشل میڈیا پر باضابطہ وضاحت جاری کرتے ہوئے کہا کہ افریقی شیروں کے فرار ہونے کی خبریں مکمل طور پر بے بنیاد ہیں۔ سوشل میڈیا پر وائرل ہونے والی اے آئی تصویر میں دو افریقی شیروں کو شہر کی ایک سڑک پر کوڑے دان کے پاس گھومتے دکھایا گیا تھا، جس سے شہریوں میں خوف پھیل گیا۔

چڑیا گھر انتظامیہ نے شہریوں کو یقین دہانی کراتے ہوئے واضح کیا کہ چڑیا گھر کے چاروں شیر اپنے احاطے میں بالکل محفوظ ہیں۔ انتظامیہ کے مطابق اس افواہ کی ایک وجہ رواں ہفتے پولیس اور فائر فائٹرز کے ساتھ کی جانے والی معمول کی سالانہ حفاظتی مشقیں بھی بنیں، جو فرضی ایمرجنسی سے نمٹنے کے لیے انجام دی جاتی ہیں۔