انڈر 19 ایشیا کپ: پاکستان نے نیپال کو ہرا کر ایونٹ میں مسلسل تیسری فتح حاصل کرلی

عمان میں جاری انڈر 19 کرکٹ ایشیا کپ کے اہم مقابلے میں پاکستان نے نیپال کو 101 رنز سے شکست دے کر ایونٹ کے گروپ مرحلے میں مسلسل تیسری کامیابی حاصل کر لی ہے اور ناقابلِ شکست رہنے کا اعزاز برقرار رکھا ہے۔ پاکستان نے پہلے بیٹنگ کرتے ہوئے مقررہ 50 اوورز میں 7 وکٹوں کے نقصان پر 275 رنز کا مجموعہ ترتیب دیا۔ قومی ٹیم کی جانب سے احمد حسین نے 89 اور کپتان فرحان یوسف نے 74 رنز کی شاندار اننگز کھیلیں۔ 276 رنز کے ہدف کے تعاقب میں نیپال کی پوری ٹیم 174 رنز پر ڈھیر ہو گئی۔ بیٹنگ میں عمدہ کارکردگی کے بعد احمد حسین نے بولنگ میں بھی جادو جگاتے ہوئے 4 کھلاڑیوں کو آؤٹ کیا، جبکہ محمد صیام اور محمد حذیفہ نے دو دو وکٹیں حاصل کر کے ٹیم کی فتح میں اہم کردار ادا کیا۔