امریکا میں شامی گلوکارہ اصالہ نصری کے 60 لاکھ ڈالر کے زیورات چوری

شام کی معروف گلوکارہ اصالہ نصری کے تقریباً 60 لاکھ ڈالر (تقریباً 1 ارب 67 کروڑ پاکستانی روپے) مالیت کے نایاب زیورات امریکہ کے شہر ڈیٹرائٹ کے ایک ہوٹل سے چوری ہو گئے ہیں، جس پر امریکی پولیس نے فوری تحقیقات کا آغاز کر دیا ہے۔ گلوکارہ کے مطابق یہ واقعہ فاکس تھیٹر میں ان کے امریکہ دورے کے آخری کنسرٹ کے دوران پیش آیا، جب وہ ہوٹل سے زیورات تبدیل کر کے شو پر گئیں اور اگلی صبح واپسی پر ان کا قیمتی زیورات کا ڈبہ غائب تھا۔ اصالہ نصری نے بتایا کہ چوری ہونے والے زیورات میں خاندانی ورثہ اور شوہر و بچوں کی طرف سے دیے گئے جذباتی تحائف شامل ہیں۔ واقعے کو ایک ہفتہ گزرنے اور ہوٹل کے عملے سے پوچھ گچھ کے باوجود ابھی تک زیورات کا کوئی سراغ نہیں مل سکا ہے۔ واضح رہے کہ ڈیٹرائٹ میں حالیہ عرصے کے دوران چوری کے جرائم میں نمایاں اضافہ ریکارڈ کیا گیا ہے۔