حمیرا ظہیر آئی سی یو میں زیر علاج، بشریٰ انصاری کی دعا کی اپیل

پاکستان کی معروف و سینئر اداکارہ بشریٰ انصاری نے اپنی 54 سالہ دیرینہ دوست اور سینئر آرٹسٹ حمیرا ظہیر کی صحت سے متعلق تازہ معلومات شیئر کرتے ہوئے مداحوں سے ان کی جلد صحت یابی کے لیے دعاؤں کی اپیل کی ہے۔ بشریٰ انصاری کے مطابق حمیرا ظہیر کی طبیعت اچانک خراب ہونے کے بعد انہیں انتہائی نگہداشت کے شعبے (ICU) میں منتقل کر دیا گیا تھا، جہاں وہ گزشتہ ایک ہفتے سے زیرِ علاج ہیں تاہم ان کی حالت میں تاحال کوئی خاص بہتری نہیں آئی ہے۔ اداکارہ نے بتایا کہ وہ اور بہروز سبزواری روزانہ اپنے غم و خوشی کی ساتھی دوست کی عیادت کے لیے ہسپتال جا رہے ہیں۔ موجودہ دور میں ذہنی دباؤ کے صحت پر منفی اثرات کا ذکر کرتے ہوئے بشریٰ انصاری نے اپنے تمام مداحوں اور سوشل میڈیا فالوورز سے درخواست کی ہے کہ وہ حمیرا ظہیر کی مکمل اور جلد صحتیابی کے لیے بالخصوص دعا کریں۔