لڑکی نے 60 روز تک سو کر 28 لاکھ روپے سے زائد کمالیے

بھارتی میڈیا کی رپورٹس کے مطابق گھریلو اشیاء اور میٹرس بنانے والی معروف کمپنی ‘ویک فٹ’ (Wakefit) کے زیرِ اہتمام منعقد ہونے والے منفرد 2 ماہ طویل نیند کے مقابلے (Sleep Championship) میں جینیا چیٹرجی (Jienia Chatterjee) نے کامیابی حاصل کر کے بھارت کی ‘سلیپ چیمپئن’ کا تاج اپنے سر سجا لیا ہے۔

اس دلچسپ مقابلے میں حصہ لینے کے لیے پورے بھارت سے 2 لاکھ سے زائد افراد نے درخواستیں جمع کروائی تھیں، تاہم سخت انٹرویوز اور مختلف مراحل کے بعد صرف 10 امیدواروں کو فائنل کے لیے منتخب کیا گیا۔ شرکاء کو باقاعدگی سے سونے، نیند کا معیار برقرار رکھنے اور مختلف ہفتہ وار چیلنجز پر کارکردگی کی بنیاد پر نمبر دیے گئے۔ فائنل مرحلے میں امیدواروں کی نیند کے حتمی اسکور کی روشنی میں جینیا چیٹرجی کو فاتح قرار دیا گیا، جنہیں 9 لاکھ 63 ہزار 400 بھارتی روپے نقد انعام کے ساتھ سیاحتی دورے کا مفت ٹکٹ بھی دیا گیا۔

کمپنی حکام کے مطابق یہ مقابلہ پہلی بار 2019ء میں متعارف کرایا گیا تھا، جس کے ابتدائی 4 سیزنز میں 10 لاکھ سے زائد لوگ درخواستیں دے چکے ہیں اور اب تک 65 سے زائد شرکاء 1,1 لاکھ روپے فی کس کی انعامی رقم بھی جیت چکے ہیں۔