ٹک ٹاکر پتلو مفرور، تعلقات سے قانون کو بے اثر بنا رہا ہے: خواجہ آصف

وزیرِ دفاع خواجہ آصف نے سیالکوٹ کے علاقے ڈسکہ میں ٹک ٹاکر کی شادی کی تقریب میں بھگدڑ مچنے سے 2 افراد کی ہلاکت کے واقعے پر شدید ردِعمل دیتے ہوئے کہا ہے کہ ٹک ٹاکر ‘پتلو’ مفرور ہے اور اثر و رسوخ استعمال کر کے قانون کو بے اثر بنا رہا ہے۔ سوشل میڈیا پلیٹ فارم ایکس (X) پر اپنے بیان میں انہوں نے کہا کہ مذکورہ ٹک ٹاکر نے زائد کمائی کے لیے نقد رقم و قیمتی انعامات کی لالچ دے کر غریب عوام کا ہجوم اکٹھا کیا اور ان کی غربت کا مذاق اڑایا، جس کے نتیجے میں بھگدڑ سے جانی نقصان ہوا اور درجنوں افراد زخمی ہوئے۔ خواجہ آصف نے بے لگام سوشل میڈیا کو معاشرے کے لیے زہرِ قاتل قرار دیتے ہوئے اربوں روپے کمانے والے سوشل میڈیا انفلوئنسرز کے احتساب، ٹیکس قوانین کے نفاذ اور ان کی ریگولیشن کا مطالبات کیا۔