فیصل قریشی کو جِم میں اپنی باڈی دکھانا مہنگا پڑگیا، سوشل میڈیا پر شدید تنقید کا سامنا

پاکستان شوبز انڈسٹری کے معروف اور سینئر اداکار فیصل قریشی کو جم سے اپنی باڈی (مسلز) کی نمائش کرنے والی ایک تصویر شیئر کرنے پر سوشل میڈیا صارفین کی جانب سے شدید تنقید کا سامنا کرنا پڑ رہا ہے۔

اداکار نے حال ہی میں فوٹو اینڈ ویڈیو شیئرنگ ایپ انسٹاگرام پر جم سے اپنی ایک تصویر شیئر کی جس میں وہ اپنے مسلز اور فٹنس کا مظاہرہ کرتے نظر آ رہے ہیں۔ اس تصویر کے کیپشن میں فیصل قریشی نے اپنے فٹنس سفر کے بارے میں بتاتے ہوئے لکھا کہ وہ پچھلے 6 سال سے باقاعدگی سے ورزش کر رہے ہیں، تاہم دو سال قبل انہیں صحیح معنوں میں غذائیت (نوٹریشن) کی اصل اہمیت اور طاقت کا اندازہ ہوا۔ انہوں نے لکھا کہ کامیابی کا انحصار صرف اس بات پر نہیں کہ آپ کتنی سخت محنت یا ورزش کرتے ہیں، بلکہ اس کا تعلق اس سے ہے کہ آپ کیا کھاتے ہیں، کتنا کھاتے ہیں، کب کھاتے ہیں اور جسم کو درکار غذائی اجزاء کو سمجھنا کتنا ضروری ہے۔ مناسب ورزش سے لے کر ریکوری اور وٹامنز تک سب کچھ سمجھداری سے جڑا ہے۔ اداکار کا مزید کہنا تھا کہ ان کی عمر میں نتائج ملنے میں کچھ زیادہ وقت لگ سکتا ہے، لیکن اگر آپ کے پاس درست معلومات، مستقل مزاجی اور نظم و ضبط ہو تو منزل ضرور ملتی ہے۔

تاہم، سوشل میڈیا پر فیصل قریشی کی یہ تصویر سامنے آتے ہی وائرل ہو گئی، اور مداحوں اور سوشل میڈیا صارفین کی ایک بڑی تعداد نے ان کے اس انداز کو تنقید کا نشانہ بناتے ہوئے ناپسندیدگی کا اظہار کیا ہے۔