انڈونیشیا میں جنگلاتی آگ کے زہریلے دھوئیں سے ایک ماہ میں ہزاروں اموات

انڈونیشیا میں شدید خشک سالی اور ایل نینو کے اثرات کے باعث بھڑکنے والی جنگلاتی آگ کے زہریلے دھوئیں نے ستمبر کے دوران 3 ہزار 560 افراد کی جان لے لی، جبکہ شہری و صنعتی فضائی آلودگی سے مجموعی اموات کی تعداد 5 ہزار 310 تک پہنچ گئی ہے۔ سینٹر فار ریسرچ آن انرجی اینڈ کلین ایئر (CREA) کی تازہ رپورٹ کے مطابق اگست کے مقابلے میں ستمبر کے دوران فضائی آلودگی سے اموات میں 42 فیصد کا نمایاں اضافہ ہوا ہے۔ رپورٹ میں بتایا گیا کہ کلیمانتن اور سماٹرا میں اموات کا بڑا سبب جنگلات کی آگ ہے، جبکہ جاوا کے علاقے شہری و صنعتی آلودگی سے متاثر ہوئے ہیں۔ آگ سے پیدا ہونے والے زہریلے دھوئیں نے خطے کے دیگر ممالک ملائیشیا، سنگاپور، فلپائن اور مشرقی تیمور کو بھی اپنی لپیٹ میں لے لیا ہے۔