سری لنکا کا اہم کھلاڑی پاکستان کیخلاف ٹیسٹ سیریز سے باہر

سری لنکا کے اسٹار بیٹر پتھم نسانکا انجری سے مکمل صحت یاب نہ ہونے کے باعث پاکستان کے خلاف آئندہ دو ٹیسٹ میچوں کی اہم سیریز سے باہر ہو گئے ہیں۔

سری لنکن کرکٹ بورڈ کے مطابق نسانکا کو ابتدائی ٹیسٹ اسکواڈ میں فٹنس سے مشروط طور پر شامل کیا گیا تھا، تاہم وہ سیریز کا آغاز ہونے سے قبل مطلوبہ مکمل فٹنس حاصل کرنے میں ناکام رہے۔ یاد رہے کہ اس سے قبل انجری ہی کی وجہ سے وہ پاکستان میں کھیلی گئی ٹی ٹوئنٹی انٹرنیشنل سیریز اور انگلینڈ، پاکستان اور سری لنکا پر مشتمل سہ ملکی ون ڈے سیریز میں بھی شرکت نہیں کر سکے تھے۔ پتھم نسانکا کے باہر ہونے کے بعد ان کی جگہ لاہیرو یوڈارا کو ٹیسٹ اسکواڈ میں شامل کر لیا گیا ہے، جو پہلے ہی ون ڈے اسکواڈ کا حصہ ہیں اور اب ٹیسٹ ٹیم کو بھی جوائن کریں گے۔ لاہیرو یوڈارا اس سے قبل بھی سری لنکا کی طرف سے ٹیسٹ اور ٹی ٹوئنٹی کرکٹ کھیل چکے ہیں، جنہوں نے سال 2026 میں ویسٹ انڈیز کے خلاف ورلڈ ٹیسٹ چیمپئن شپ کی سیریز کے دوران اپنے کیریئر کی بہترین اننگز کھیلتے ہوئے شاندار 188 رنز بنائے تھے۔

واضح رہے کہ پاکستان اور سری لنکا کے درمیان دو ٹیسٹ میچوں کی سیریز کا پہلا مقابلہ 9 نومبر کو راولپنڈی میں کھیلا جائے گا، جبکہ دوسرا اور آخری ٹیسٹ 17 نومبر سے لاہور میں شروع ہوگا۔