ون ڈے ٹرائی سیریز: پاکستان اور سری لنکا آج مدمقابل ہوں گے

ون ڈے ٹرائی سیریز کا پانچواں اور اہم میچ آج پاکستان اور سری لنکا کی ٹیموں کے درمیان قذافی اسٹیڈیم لاہور میں کھیلا جائے گا۔ دونوں ٹیمیں دوپہر ایک بجے مدمقابل ہوں گی، جبکہ سری لنکن ٹیم نے میچ سے قبل اسٹیڈیم میں بھرپور پریکٹس سیشن بھی کیا۔

قومی کرکٹ ٹیم اس ٹرائی سیریز کے فائنل کے لیے پہلے ہی اپنی جگہ پکی کر چکی ہے، کیونکہ پاکستان نے اب تک کھیلے گئے تینوں میچوں میں شاندار فتوحات حاصل کی ہیں۔ دوسری جانب، سری لنکا نے اس سیریز میں اب تک دو میچز کھیلے ہیں، جن میں سے ایک میں اسے کامیابی اور دوسرے میں شکست کا سامنا کرنا پڑا۔ دریں اثنا، ناقص کارکردگی کے تسلسل کے باعث اوپنر صائم ایوب کو پاکستان کے ون ڈے اسکواڈ سے ریلیز کر دیا گیا ہے، اور ان کی جگہ جارحانہ مزاج بیٹر صاحبزادہ فرحان کو قومی ون ڈے اسکواڈ میں شامل کر لیا گیا ہے۔