سہ ملکی ون ڈے سیریز: سری لنکا نے پاکستان کو ہرا کر فائنل کیلئے کوالیفائی کرلیا

لاہور میں کھیلے گئے سہ ملکی ون ڈے سیریز کے پانچویں میچ میں سری لنکا نے پاکستان کو 8 وکٹوں سے شکست دے دی ہے۔ سری لنکا نے ٹاس جیت کر پہلے باؤلنگ کا فیصلہ کیا، جس کے بعد پاکستانی ٹاپ آرڈر بری طرح ناکام ہوا اور پوری ٹیم 25.3 اوورز میں محض 110 رنز پر آل آؤٹ ہو گئی، جو دونوں ٹیموں کے درمیان ون ڈے میچز میں تیسرا کم ترین اسکور ہے۔ پاکستان کی جانب سے بابر اعظم 29 اور حسن نواز 17 رنز کے ساتھ نمایاں رہے، جبکہ سری لنکا کے دلشان مدھوشنکا نے شاندار باؤلنگ کا مظاہرہ کرتے ہوئے 34 رنز کے عوض 5 وکٹیں حاصل کیں۔ جواب میں سری لنکا نے 111 رنز کا ہدف 18 اوورز میں 2 وکٹوں کے نقصان پر باآسانی حاصل کر لیا، جس میں کامیندو مینڈس 62 رنز بنا کر نمایاں رہے۔ واضح رہے کہ پاکستان پہلے ہی سیریز کے فائنل کے لیے کوالیفائی کر چکا ہے۔