واٹس ایپ ویب اور ڈیسک ٹاپ کے ذریعے سائبر حملوں کا ہائی الرٹ جاری

نیشنل سائبر ایمرجنسی رسپانس ٹیم نے واٹس ایپ ویب، ڈیسک ٹاپ اور ای میل کے ذریعے ممکنہ سائبر حملوں کے پیشِ نظر ہائی الرٹ جاری کرتے ہوئے سرکاری حکام اور حساس معلومات رکھنے والے افراد کو خصوصی احتیاط کی ہدایت کی ہے۔ ایڈوائزری کے مطابق حملہ آور سرکاری محکموں کی نقالی کر کے ٹارگٹڈ فشنگ، ریموٹ کنٹرول میلویئر اور جعلی سرکاری دستاویزات کے ذریعے ونڈوز سسٹمز کو متاثر کر کے پاس ورڈز اور اہم ڈیٹا چرانے کی کوشش کر رہے ہیں۔ سائبر حکام نے حساس معلومات رکھنے والے افسران کو ونڈوز کمپیوٹرز پر واٹس ایپ ویب کے استعمال سے گریز، غیر مصدقہ لنکس یا فائلوں کو نہ کھولنے، اور ٹو سٹیپ ویریفکیشن فعال رکھنے کی سفارش کی ہے۔ علاوہ ازیں، مشکوک سیشنز فوری ختم کرنے اور متاثرہ ڈیوائسز کو نیٹ ورک سے الگ کر کے سسٹم لاگز محفوظ بنانے کی سخت ہدایات بھی جاری کی گئی ہیں۔