پٹرولیم لیوی کا خاتمہ چاہتے ہیں، حکومت کو 10 روز کی مہلت دے رہے: حافظ نعیم الرحمٰن

امیر جماعت اسلامی پاکستان حافظ نعیم الرحمٰن نے وزیراعظم کے ساتھ مذاکراتی کمیٹی کی ملاقات کے بعد میڈیا سے گفتگو کرتے ہوئے کہا ہے کہ حکومت کو پیٹرولیم لیوی کے خاتمے اور عوام کو مہنگائی سے ریلیف دینے کے لیے مزید 7 سے 10 روز کی مہلت دی جا رہی ہے۔ انہوں نے واضح کیا کہ جماعت اسلامی کے دھرنے اور لانگ مارچ کا اعلان اپنی جگہ برقرار ہے اور پیٹرولیم لیوی عوام پر ایک بھتہ ٹیکس کی مانند ہے جسے فوری ختم ہونا چاہیے۔ حافظ نعیم الرحمٰن کے مطابق وزیراعظم نے تکنیکی کمیٹیوں کے ذریعے 8 سے 10 دنوں میں پیش رفت اور ریلیف کی یقین دہانی کرائی ہے، تاہم جماعت اسلامی اپنے بنیادی مطالبات پر قائم ہے اور حکومت سے فوری طور پر عوام کو ریلیف فراہم کرنے کا تقاضا کرتی ہے۔