امریکا اور اسرائیل کی جارحیت پورے خطے کو لپیٹ میں لے سکتی ہے، پاسداران انقلاب

ایرانی پاسدارانِ انقلاب (IRGC) کے ترجمان بریگیڈیئر جنرل حسین محبی نے انتہائی سخت خبردار کرتے ہوئے کہا ہے کہ امریکا اور اسرائیل کی مشترکہ جارحیت کے اثرات صرف ایران تک محدود نہیں رہیں گے بلکہ پورا خطہ اس کی لپیٹ میں آئے گا، جس سے دیگر علاقائی ممالک کا مستقبل بھی شدید متاثر ہو سکتا ہے۔

اپنے ایک اہم بیان میں بریگیڈیئر جنرل حسین محبی نے ایرانی قوم پر زور دیا کہ وہ درپیش محاذ آرائی کی حساسیت کو سمجھتے ہوئے قومی اتحاد کو برقرار رکھیں اور ملکی صلاحیتوں پر کامل بھروسہ کریں۔ انہوں نے عزم کا اظہار کرتے ہوئے کہا کہ ایران اس جنگ میں مکمل فتح حاصل کر کے ایک عالمی طاقت بن کر ابھرے گا۔

ترجمان پاسدارانِ انقلاب نے مزید کہا کہ امریکا اور اسرائیل کے ساتھ جاری یہ کشمکش محض ایک فوجی محاذ تک محدود نہیں، بلکہ اس کا براہِ راست تعلق ایرانی قومی شناخت، ثقافت، مذہب اور اسلامی تہذیب کے تحفظ سے ہے۔ ان کا کہنا تھا کہ واشنگٹن اور تل ابیب ایران کی آزادانہ شناخت کو کمزور کرنے اور اپنی اقدار و نظام مسلط کر کے ملک کو تقسیم کرنے کے درپے ہیں۔