سعودی عرب میں حوثیوں کے داغے گئے 2 بیلسٹک میزائلز فضا میں ہی تباہ

سعودی عرب میں یمن کے حوثی باغیوں کی جانب سے داغے گئے 2 بیلسٹک میزائلوں کو فضا میں ہی کامیابی سے تباہ کر دیا گیا ہے، تاہم ان میزائلوں کا ملبہ مکہ مکرمہ، جدہ، طائف اور رابغ کے مختلف علاقوں میں گرا ہے۔

سعودی محکمہ شہری دفاع کے ترجمان کے مطابق دونوں بیلسٹک میزائل اپنے مقررہ اہداف کی جانب بڑھ رہے تھے کہ دفاعی نظام نے انہیں راستے میں ہی روک کر ناکارہ بنا دیا۔ حکام کے مطابق تباہ شدہ میزائلوں کے ٹکڑے مکہ مکرمہ کی وادی المغمس، جدہ کے علاقے النزهہ، طائف کی وادی جلیل اور گورنریٹ رابغ کے علاقے مستورہ میں گرے۔

سعودی حکام نے واقعے کے فوری بعد تمام طے شدہ حفاظتی اور ہنگامی اقدامات پر عمل درآمد شروع کر دیا ہے۔ ریلیف اور سیکیورٹی اداروں کی ابتدائی رپورٹس کے مطابق واقعے میں کسی جانی یا مالی نقصان کی اطلاع موصول نہیں ہوئی ہے۔