اسرائیل کے مقبوضہ علاقے ایک گھنٹے میں ناقابل رہائش بن جائیں گے، ایران نے خبردار کر دیا

ایران کے سینئر قانون ساز نے اسرائیل کو سخت خبردار کرتے ہوئے کہا ہے کہ تہران کے خلاف کسی بھی قسم کے غلط اندازے یا جارحانہ اقدام کے نتیجے میں اسرائیل کے مقبوضہ علاقوں کو ایک گھنٹے سے بھی کم وقت میں ناقابلِ رہائش بنایا جا سکتا ہے۔

ایرانی پارلیمنٹ کی قومی سلامتی اور خارجہ پالیسی کمیٹی کے چیئرمین ابراہیم عزیزی نے سوشل میڈیا پلیٹ فارم ‘ایکس’ (X) پر جاری ایک بیان میں یہ سنگین دھمکی دی۔ انہوں نے اسرائیل کے زیرِ قبضہ علاقوں میں واقع اہم ترین تنصیبات کا ایک تفصیلی نقشہ بھی شیئر کیا، جس میں واٹر ڈیسیلینیشن (پانی صاف کرنے کے) پلانٹس، پاور ہاؤسز، آئل ریفائنریز، اہم پل، راہداریاں اور دیمونا (Dimona) جوہری تنصیب کی واضح نشاندہی کی گئی ہے۔

ابراہیم عزیزی نے کہا کہ ان اہم تنصیبات کا ایک دوسرے کے اتنے قریب واقع ہونا اسرائیل کے بنیادی ڈھانچے (Infra-structure) کی شدید کمزوری کو ظاہر کرتا ہے۔ انہوں نے واضح کیا کہ ایران پر کسی بھی حملے کی صورت میں متعدد محاذوں سے ایسا شدید جوابی وار کیا جائے گا کہ حملہ آوروں اور ان کے حامیوں کو سنبھلنے کا موقع نہیں ملے گا۔ یہ دھمکی ایک ایسے وقت میں سامنے آئی ہے جب واشنگٹن اور تل ابیب کی جانب سے بیانات کے بعد خطے میں فوجی کشیدگی عروج پر ہے۔