ایران پر نئے حملے پر غور کر رہے ہیں، شاید کل ہی شروع کر دیں: امریکی صدر

امریکی صدر ڈونلڈ ٹرمپ نے واضح کیا ہے کہ وہ ایران کے خلاف کارروائیاں جاری رکھنے کے تحت نئے حملے شروع کرنے پر غور کر رہے ہیں، اور یہ حملے شاید کل ہی سے شروع کیے جا سکتے ہیں۔

میڈیا سے گفتگو کرتے ہوئے امریکی صدر نے زور دے کر کہا کہ تہران کو کسی بھی صورت جوہری ہتھیار بنانے کی اجازت نہیں دی جائے گی۔ ان کا کہنا تھا کہ ایران اب بھی کسی حتمی معاہدے پر دستخط کر کے مزید فوجی کارروائی سے بچ سکتا ہے۔ ٹرمپ کے مطابق “ایران معاہدہ کرنا چاہتا ہے لیکن اصل سوال یہ ہے کہ کیا وہ اس پر مکمل پاسداری کرے گا؟” جب ایک صحافی نے سوال پوچھا کہ کیا حملے کا فیصلہ ہو چکا ہے، تو انہوں نے مسکراتے ہوئے حتمی جواب دینے سے گریز کیا اور کہا، “اگر میں نے فیصلہ کر لیا ہے، تو کیا میں آپ کو بتاؤں گا کہ میں حملہ کرنے جا رہا ہوں؟”

امریکی صدر نے مزید کہا کہ بی-2 (B-2) بمبار طیاروں کے ذریعے پہلے کی جانے والی کارروائی دیرپا نتائج کے لیے کافی نہیں تھی، اس لیے ہمارا مقصد ایران کی جوہری ہتھیار بنانے کی صلاحیت کو مستقل طور پر ختم کرنا ہے، چاہے وہ معاہدے سے ممکن ہو یا مکمل ملٹری آپریشن سے۔