اسحاق ڈار کی زیر صدارت کابینہ کمیٹی کا اجلاس، گندم مہنگی کرنے کے رجحان پر اظہارِ تشویش

نائب وزیرِ اعظم و وزیرِ خارجہ سینیٹر محمد اسحاق ڈار نے گندم کی قیمتوں میں اضافے کے رجحان پر شدید تشویش کا اظہار کرتے ہوئے متعلقہ حکام کو مارکیٹ میں گندم کی فراہمی بڑھانے اور قیمتوں کو مستحکم رکھنے کے لیے فوری و مؤثر اقدامات کی ہدایت کی ہے۔

یہ ہدایات انہوں نے ضروری اشیائے خورونوش کی فراہمی، ملکی ذخائر اور قیمتوں پر کنٹرول کے حوالے سے قائم کابینہ کمیٹی کے اعلیٰ سطح اجلاس کی صدارت کرتے ہوئے دیں۔ اجلاس کو بریفنگ دیتے ہوئے حکام نے بتایا کہ ملک میں گندم اور دیگر بنیادی اشیاء کے ذخائر تسلی بخش ہیں اور یہ اگلی فصل کی آمد تک مقامی ضروریات کو پورا کرنے کے لیے کافی ہیں۔

اجلاس میں چینی کی صورتحال کا جائزہ لیتے ہوئے بتایا گیا کہ مارکیٹ میں چینی کی قیمت 155 روپے فی کلوگرام کی مقررہ پرچون حد سے نمایاں طور پر کم ہے اور آئندہ کرشنگ سیزن تک مطلوبہ استعمال سے زائد ذخائر موجود ہیں۔ نائب وزیرِ اعظم نے واضح کیا کہ عوام کو مناسب قیمتوں پر غذائی اشیاء کی فراہمی حکومت کی ترجیح ہے، اور ہدایت کی کہ ذخیرہ اندوزی اور قیاس آرائیوں کے خلاف زیرو ٹالرنس پالیسی پر عمل درآمد یقینی بنایا جائے۔