پاکستان اور کینیڈا کے طبی اداروں میں تعاون کیلئے مفاہمتی یادداشت پر دستخط

پاکستان اور کینیڈا کے ممتاز طبی اداروں نے پوسٹ گریجویٹ میڈیکل تعلیم، اعلیٰ تربیت اور پیشہ ورانہ صلاحیتوں میں اضافے کے لیے ایک اہم مفاہمتی یادداشت (MoU) پر دستخط کر دیے ہیں۔ اوٹاوا میں پاکستانی ہائی کمیشن کی جانب سے جاری پریس ریلیز کے مطابق یہ معاہدہ کالج آف فزیشنز اینڈ سرجنز پاکستان (CPSP) اور رائل کالج آف فزیشنز اینڈ سرجنز آف کینیڈا (RCPSC) کے درمیان طے پایا۔ سی پی ایس پی کے صدر پروفیسر ڈاکٹر خالد مسعود گوندل اور آر سی پی ایس سی کے چیف ایگزیکٹو آفیسر ڈاکٹر کرسٹوفر واٹلنگ نے اپنے اپنے وفود کی قیادت کی۔ اس تاریخی شراکت داری کے تحت دونوں ادارے پوسٹ گریجویٹ طبی تعلیم، ادارہ جاتی صلاحیتوں کی بہتری اور جدید ترین طریقہ کار کے تبادلے کے لیے باہمی تعاون کو فروغ دیں گے۔