شہباز شریف کی صدر آزاد کشمیر سے ملاقات، کشمیریوں کی حمایت جاری رکھنے کا عزم

وزیراعظم محمد شہباز شریف سے صدر آزاد جموں و کشمیر ڈاکٹر محمد نجیب نقی خان نے اسلام آباد میں ملاقات کی، جس میں وزیراعظم نے انہیں آزاد کشمیر کا منصب سنبھالنے پر مبارکباد دی اور نیک خواہشات کا اظہار کیا۔ ملاقات کے دوران وزیراعظم نے آزاد جموں و کشمیر میں جاری ترقیاتی منصوبوں کو تیز کرنے اور عوام کا معیارِ زندگی بہتر بنانے کے لیے وفاقی حکومت کے مکمل تعاون کا عزم ظاہر کیا۔ شہباز شریف نے اقوام متحدہ کی قراردادوں اور حقِ خودارادیت کے مطابق کشمیری عوام کی منصفانہ جدوجہد کے لیے پاکستان کی غیر متزلزل اخلاقی، سیاسی اور سفارتی حمایت کا اعادہ کیا۔ اس اعلیٰ سطحی ملاقات میں وزیراعظم کے مشیر رانا ثناء اللہ خان بھی موجود تھے۔