تائیوان میں سمندری طوفان چمپی کی تباہ کاریاں، ایک شخص ہلاک، 171 زخمی

تائیوان میں شدید سمندری طوفان ’چمپی‘ نے بڑے پیمانے پر تباہی مچا دی ہے، جس کے نتیجے میں مختلف حادثات میں ایک شخص ہلاک اور 171 افراد زخمی ہو گئے ہیں، جبکہ ایک ہزار سے زائد افراد کو محفوظ مقامات پر منتقل کر دیا گیا ہے۔ خبر ایجنسی کے مطابق طوفان کا سب سے زیادہ اثر شمال مشرقی ساحلی علاقوں میں دیکھا جا رہا ہے، جہاں محکمہ موسمیات نے ہفتے کے روز تک 90 سینٹی میٹر بارش کی پیشگوئی کی ہے۔ طوفانی خطرے کے پیش نظر حکام نے ساحلی علاقوں میں تمام تعلیمی ادارے اور دفاتر بند کر دیے ہیں اور شہریوں کو ساحلی و پہاڑی علاقوں سے دور رہنے کی ہدایت جاری کی ہے۔ دوسری جانب جاپان کے اوکیناوا جزائر بھی طوفان کی زد میں آئے ہیں جہاں شدید ہواؤں اور بارش کے باعث تقریباً 8 ہزار 400 گھروں کی بجلی منقطع ہو گئی ہے۔