اسلام آباد میں مین ہٹن طرز کا منصوبہ بنانے کا اعلان، سعودی سرمایہ کاروں کو دعوت

وفاقی وزیر داخلہ محسن نقوی نے اسلام آباد میں جدید طرز کے رہائشی اور تفریحی منصوبے شروع کرنے کا اعلان کرتے ہوئے سعودی عرب کے سرمایہ کاروں کو پاکستان میں سرمایہ کاری کی دعوت دے دی ہے۔ سعودی ریئل اسٹیٹ ایکسپو سے خطاب کرتے ہوئے محسن نقوی نے بتایا کہ دارالحکومت میں نیویارک کے ’مین ہیٹن‘ کی طرز پر ایک شاندار منصوبہ تیار کرنے کا ارادہ ہے، جس میں مرکزی پارک کے گرد تمام تر جدید رہائشی و کاروباری سہولیات میسر ہوں گی۔ انہوں نے سفاری پارک کو بھی جدید بنانے اور جانوروں و تفریحی سہولیات میں اضافے کے منصوبے کا ذکر کیا۔ وزیر داخلہ نے کہا کہ سرمایہ کاری کا عمل تیز تر بنانے کے لیے ون ونڈو آپریشن شروع کیا جا رہا ہے جس سے منصوبوں کی منظوری مہینوں کے بجائے دنوں میں ممکن ہوگی، جبکہ شفافیت یقینی بنانے کے لیے تمام نیلامی کے عمل میں متعلقہ فریقوں کو شامل رکھا جائے گا۔