اسلام آباد میں گردوں کی غیر قانونی پیوندکاری میں ملوث گروہ بے نقاب، 5 ملزم گرفتار

وفاقی تحقیقاتی ادارے (ایف آئی اے) کے اینٹی کرپشن سرکل نے گردوں کی غیر قانونی پیوند کاری میں ملوث بین الاضلاعی گروہ کو بے نقاب کرتے ہوئے 5 ملزمان کو گرفتار کر لیا ہے۔ ایف آئی اے حکام کے مطابق گرفتار ملزمان بغیر کسی طبی ڈگری کے نجی ہاؤسنگ سوسائٹیوں اور رہائشی مکانات میں غیر قانونی سرجریز کرتے تھے، جب کہ ڈائلائسز اور ٹیسٹ اسلام آباد کے ایک ہسپتال سے کروائے جاتے تھے۔ ملزمان نے ایک شہری سے پیوندکاری کے لیے 30 لاکھ روپے وصول کیے اور ڈونر کو محض 4 لاکھ روپے دیے گئے۔ کارروائی کے دوران 10 لاکھ روپے نقدی اور 3 گاڑیاں برآمد کی گئی ہیں، جب کہ ملزمان کی 8 کروڑ 75 لاکھ روپے مالیت کی جائیدادیں منجمد کر کے گاڑیاں منسوخ اور بینک اکاؤنٹس کی جانچ پڑتال کے لیے خطوط ارسال کر دیے گئے ہیں۔