اسپیس ایکس کے راکٹ لانچ کے بعد آسمان پر بننے والا دلکش نظارہ

امریکی خلائی تحقیقاتی کمپنی ‘اسپیس ایکس’ کے کارگو مشن CRS-35 کی روانگی کے دوران فلوریڈا کے آسمان پر ایک نایاب اور دلکش منظر دیکھنے میں آیا، جب راکٹ کے اخراج سے بننے والے دھویں کے بادل سورج کی روشنی میں چمک کر ایک دیوہیکل ’جیلی فش‘ کی شکل اختیار کر گئے۔ ماہرین فلکیات کے مطابق یہ غیر معمولی بصری اثر اس وقت پیدا ہوتا ہے جب راکٹ غروبِ آفتاب یا طلوعِ آفتاب کے قریب پرواز کرتا ہے، جس سے زمین پر تو اندھیرا ہوتا ہے مگر شدید بلندی پر موجود گیس کے بادلوں پر سورج کی چمک برقرار رہتی ہے۔ خلائی ادارے ناسا (NASA) نے اس حیرت انگیز منظر کی پرکشش تصاویر اپنے سوشل میڈیا اکاؤنٹس پر شیئر کی ہیں جنہیں دنیا بھر میں فلکیات کے شائقین کی جانب سے بے حد پسند کیا جا رہا ہے۔