انصاف کی فراہمی کیلئے عدلیہ اور وکلاء کا تعاون ناگزیر ہے: چیف جسٹس آزاد کشمیر

چیف جسٹس آزاد جموں و کشمیر جسٹس راجہ سعید اکرم خان نے سنٹرل بار ایسوسی ایشن کے زیرِ اہتمام منعقدہ تقریب سے خطاب کرتے ہوئے کہا ہے کہ قانون کی بالادستی، عدلیہ کے وقار اور عوام کو بروقت انصاف کی فراہمی کے لیے بینچ اور بار کے درمیان باہمی احترام، اعتماد اور تعاون ناگزیر ہے۔ انہوں نے وکلاء، بالخصوص جونیئر وکلاء پر زور دیا کہ وہ اپنے مقدمات مکمل تیاری، ٹھوس دلائل اور دیانت داری سے پیش کریں تاکہ انصاف کا عمل مزید موثر اور فعال ہو سکے۔ اس موقع پر صدر سنٹرل بار ایسوسی ایشن راجہ ضیغم افتخار نے چیف جسٹس اور دیگر معزز جج صاحبان کی تشریف آوری پر شکریہ ادا کیا اور ان کی عدالتی خدمات کو سراہا۔ تقریب کے اختتام پر چیف جسٹس اور سپریم کورٹ کے معزز جج صاحبان نے نئے انرول ہونے والے وکلاء میں پریکٹس کے لائسنس تقسیم کیے۔