کابل میں چائے پینے کے بعد دہشت گردوں کو چھوڑنا بڑی غلطی تھی: اسحاق ڈار

نائب وزیراعظم اور وزیرِ خارجہ اسحاق ڈار نے پارلیمنٹ کے مشترکہ اجلاس سے خطاب کرتے ہوئے ماضی کی حکومت کی جانب سے کالعدم ٹی ٹی پی کے جنگجوؤں کو واپس لانے اور کابل میں چائے پی کر دہشت گردوں کو رہا کرنے کے فیصلوں پر شدید تنقید کی ہے۔ انہوں نے کہا کہ سرحدیں کھول کر دہشت گردوں کو ملک میں واپس آنے کی اجازت دینا ایک سنگین غلطی تھی جس کی بھاری قیمت پوری قوم ادا کر رہی ہے، اس لیے ان فیصلوں کی ذمہ داری کا تعین لازمی ہے۔ اسحاق ڈار نے واضح کیا کہ آرمی پبلک اسکول سانحے کے بعد آپریشن ضربِ عضب اور نیشنل ایکشن پلان کے تحت حاصل کی گئی کامیابیوں کو ماضی کے غلط فیصلوں سے نقصان پہنچا، اور اب دہشت گردی کے خلاف کسی تاخیر کے بغیر فیصلہ کن حکمت عملی ناگزیر ہو چکی ہے۔