ایران پر زمینی حملہ امریکی فوج کیلئے تباہ کن ثابت ہوگا: مشیر اعلیٰ کمانڈر انچیف پاسداران انقلاب

ایران پر ممکنہ امریکی زمینی حملے کی اطلاعات اور قیاس آرائیوں پر سخت ردِعمل ظاہر کرتے ہوئے ایرانی پاسدارانِ انقلاب فورس (IRGC) کے کمانڈر انچیف کے مشیرِ اعلیٰ بریگیڈیئر جنرل محمد رضا نقدی نے کہا ہے کہ امریکہ ایران پر زمینی چڑھائی کی جرات ہرگز نہیں کر سکتا۔

ایرانی ذرائع ابلاغ کو دیے گئے بیان میں بریگیڈیئر جنرل محمد رضا نقدی نے واضح کیا کہ ایران کی سرزمین پر حملہ امریکی افواج کے لیے تباہ کن اور ہولناک ثابت ہوگا۔ انہوں نے زمینی حملے سے متعلق خبروں کو امریکی میڈیا کا من گھڑت پروپیگنڈا قرار دیتے ہوئے کہا کہ واشنگٹن انتظامیہ اس قسم کے قدم کے نتائج سے بخوبی واقف ہے، اسی لیے امریکی ملٹری کمانڈر ایسے بھیانک اقدام سے پرہیز کریں گے۔ جنرل نقدی نے متنبہ کیا کہ اگر امریکی افواج نے زمینی پیش قدمی کی غلطی کی تو بڑی تعداد میں امریکی فوجی گرفتار ہو کر ایرانی قید میں چلے جائیں گے۔

ان کا مزید کہنا تھا کہ امریکہ نے ماضی میں عراق اور افغانستان کی جنگوں میں کھربوں ڈالر جھونک دیے لیکن ان کا انجام صرف اور صرف رسوائی اور ناکامی پر ہوا۔ انہوں نے اس عزم کا اعادہ کیا کہ ایران اپنی دفاعی صلاحیتوں اور مسلح افواج پر مکمل اعتماد رکھتا ہے اور کسی بھی عسکری جارحیت کا منھ توڑ جواب دینے کے لیے پوری طرح تیار ہے۔