پاکستان اور عمان کا خطے میں امن کیلئے ملکر کام کرنے پر اتفاق

نائب وزیراعظم و وزیر خارجہ سینیٹر اسحاق ڈار اور عمان کے وزیر خارجہ سید بدر بن حمد بن حمود البوسعیدی کے درمیان اہم ملاقات ہوئی ہے، جو دونوں ممالک کے آٹھویں مشترکہ وزارتی اجلاس سے قبل منعقد ہوئی۔ دفتر خارجہ کے ترجمان کے مطابق ملاقات کے دوران دونوں برادر ممالک کے درمیان دیرینہ تعلقات کا اعادہ کیا گیا اور باہمی دلچسپی کے تمام شعبوں میں تعاون کو مزید فروغ دینے کے لیے اعلیٰ سطح پر رابطے جاری رکھنے پر اتفاق کیا گیا۔ دونوں وزرائے خارجہ نے موجودہ علاقائی صورتحال پر تفصیلی تبادلہ خیال کرتے ہوئے خطے میں پائیدار امن اور استحکام کے فروغ کے لیے مذاکرات اور سفارتکاری کو ناگزیر قرار دیا۔ عمانی وزیر خارجہ نے خطے میں امن و سلامتی کے لیے پاکستان کے کردار کو سراہا، جبکہ اسحاق ڈار نے بھی عمان کی تعمیری کوششوں کی تعریف کی۔