ملک بھر میں ہندو برادری کا مذہبی تہوار نوراتری جوش و خروش سے جاری

ملک بھر کی طرح کراچی میں بھی ہندو برادری کا مذہبی تہوار ’نوراتری‘ مکمل مذہبی جوش و جذبے کے ساتھ منایا جا رہا ہے۔ تقریبات کے دوران مندروں اور ہالز میں رنگا رنگ روایتی ملبوسات زیبِ تن کیے ہندو برادری، بالخصوص خواتین اور لڑکیاں، موسیقی کی دھنوں پر گربا اور ڈانڈیا رقص کے ذریعے خوشیوں کا اظہار کر رہی ہیں۔ ہندو برادری کے افراد نے جذبات کا اظہار کرتے ہوئے کہا کہ انہیں ہر سال اس خوبصورت تہوار کا بے صبری سے انتظار رہتا ہے اور وہ پاکستان میں مکمل مذہبی آزادی اور سکون کے ساتھ اپنے تمام مذہبی تہوار مناتے ہیں۔ نوراتری کا یہ رنگا رنگ تہوار 20 اکتوبر تک جاری رہے گا، جس میں ہر رات خصوصی عبادات اور رقص کی محفلیں سجائی جائیں گی۔