وفاق کے پاس خیبرپختونخوا میں ایمرجنسی لگانے کے سوا کوئی راستہ نہیں بچا تھا: اسحاق ڈار

نائب وزیر اعظم اسحاق ڈار نے کہا ہے کہ خیبر پختونخوا میں ایمرجنسی کا نفاذ ایک مشکل مگر ناگزیر فیصلہ تھا کیونکہ وفاقی حکومت کے پاس ریاست کے تحفظ کے لیے اس کے سوا کوئی راستہ باقی نہیں بچا تھا۔ خیبر پختونخوا اور سیکیورٹی صورتحال پر منعقدہ سیمینار سے خطاب کرتے ہوئے اسحاق ڈار نے بتایا کہ پاکستان نے دہشت گردی کے خلاف جنگ میں 90 ہزار سے زائد جانوں کا نذرانہ پیش کیا اور معاشی نقصان برداشت کیا۔ انہوں نے کہا کہ فیلڈ مارشل سید عاصم منیر کی قیادت میں سیکیورٹی فورسز روزانہ کی بنیاد پر انسدادِ دہشت گردی آپریشنز کر رہی ہیں۔ نائب وزیر اعظم نے افغان طالبان حکومت سے سخت مطالبہ کیا کہ وہ کالعدم ٹی ٹی پی اور دیگر گروپوں کو اسلحے و مالی معاونت کی فراہمی فوری بند کرے، بصورت دیگر افغانستان کو اس کے نتائج خود بھگتنا ہوں گے۔ اسحاق ڈار نے مزید انکشاف کیا کہ سانحہ جعفر ایکسپریس کا منصوبہ بھی افغانستان میں تیار کیا گیا تھا، جبکہ بھارت خطے میں کلبھوشن یادیو جیسے نیٹ ورک کے ذریعے دہشت گردی کی پشت پناہی کر رہا ہے۔