ایران جانے والے 135 تجارتی جہاز واپس موڑ دیے: امریکی فوج

امریکی سینٹرل کمانڈ (سینٹ کام) نے دعویٰ کیا ہے کہ گزشتہ تین ماہ کے دوران ایرانی بندرگاہوں کی بحری ناکہ بندی کے سلسلے میں 135 بحری جہازوں کو واپس موڑا گیا، جبکہ 4 تجارتی جہازوں کو ناکارہ اور پاسدارانِ انقلاب سے منسلک 10 آئل ٹینکروں کو تباہ کیا گیا ہے۔ سینٹ کام کے مطابق تازہ کارروائی خلیجِ عمان میں کی گئی جہاں امریکی لڑاکا طیارے نے پاناما کے پرچم تلے سفر کرنے والے تجارتی جہاز ‘ایم وی اوشن مولیکا’ (اریکا سن) کو نشانہ بنایا۔ امریکی فوج کا کہنا ہے کہ ایرانی بندرگاہ سے روانہ ہونے والے اس جہاز کو ناکہ بندی توڑنے سے روکنے کے لیے امریکی وارننگز دی گئیں، تاہم عملے کی جانب سے انتباہ نظرانداز کرنے پر گائیڈڈ گولہ بارود کا استعمال کر کے اس کا انجن اور پروپلشن سسٹم ناکارہ بنا دیا گیا۔ سینٹ کام کے مطابق حملے میں عملے کا کوئی فرد زخمی نہیں ہوا، جبکہ کارروائیوں کا مقصد ایرانی سمندری حدود میں مبینہ خلاف ورزیوں اور تجارتی نقل و حرکت پر پابندیاں برقرار رکھنا ہے۔