دھاندلی سے عوامی منڈیٹ چھینا گیا، بانی پی ٹی آئی سے ملاقات کی اجازت دی جائے، ملک گیر پرامن احتجاج کا اعلان: محمود خان اچکزئی

پختونخوا ملی عوامی پارٹی اور اپوزیشن اتحاد کے رہنما محمود خان اچکزئی نے ملک میں آئین کی بحالی، عوامی منڈیٹ کی واپسی اور جمہوریت کے تحفظ کے لیے کل سے ملک گیر پرامن احتجاج شروع کرنے کا اعلان کیا ہے۔ اسلام آباد میں پریس کانفرنس سے خطاب کرتے ہوئے انہوں نے حکومت پر شدید تنقید کی اور کہا کہ بندوق کے زور پر پاکستان تحریک انصاف (پی ٹی آئی) کے چار کروڑ ووٹرز کا منڈیٹ چرایا گیا جبکہ پیکا ایکٹ جیسے قوانین کے ذریعے میڈیا اور زبانی اظہار پر قدغنیں لگائی جا رہی ہیں۔ محمود خان اچکزئی نے بانی پی ٹی آئی سے جیل میں ملاقات کی اجازت کا مطالبہ کرتے ہوئے کہا کہ ہم ضمانت دیتے ہیں کہ ملاقات کے احوال سے متعلق باہر کچھ نہیں بتائیں گے۔ انہوں نے خیبر پختونخوا میں ایمرجنسی اور گورنر راج پر سوال اٹھاتے ہوئے کہا کہ سیکیورٹی کے سنگین حالات کے باوجود بلوچستان میں گورنر راج اس لیے نہیں لگایا جاتا کیونکہ وہاں حکومت کے ‘لاڈلے’ بیٹھے ہیں۔ انہوں نے واضح کیا کہ جہاں ایمرجنسی نافذ نہیں ہے وہاں تمام اضلاع میں پرامن جمہوری جدوجہد جاری رہے گی اور اپوزیشن اس نظام کے خلاف جدوجہد اور مذاکرات دونوں راستے کھلے رکھے گی۔