پی ٹی آئی نے احتجاج کی جعلی ویڈیوز پھیلائیں: عظمیٰ بخاری

وزیر اطلاعات پنجاب عظمیٰ بخاری نے پاکستان تحریک انصاف (پی ٹی آئی) کی جانب سے سوشل میڈیا پر احتجاج کی مبینہ جعلی ویڈیوز شیئر کرنے کا پردہ فاش کرتے ہوئے اپوزیشن پر شدید تنقید کی ہے۔ سماجی رابطے کی ویب سائٹ ‘ایکس’ پر اپنے ایک بیان میں انہوں نے نشاندہی کی کہ جامشورو میں بوائلر دھماکے کی پرانی ویڈیو کو پشاور احتجاج اور ایک بھارتی شہری کی جنتر منتر نئی دہلی کی ویڈیو کو اسلام آباد مظاہرے سے منسوب کر کے پھیلایا گیا۔ عظمیٰ بخاری نے پی ٹی آئی قیادت کو ‘جعلی لیڈرشپ اور جعلی انقلاب’ قرار دیتے ہوئے کہا کہ جس صوبے میں دہشت گرد محفوظ ہوں، پولیس نہتی ہو اور حکومت قومی ترانے و پرچم کے احترام سے عاری ہو، وہاں ایمرجنسی کا نفاذ ہی واحد حل تھا۔ انہوں نے مزید کہا کہ پی ٹی آئی نے 13 سالہ اقتدار کے دوران خیبر پختونخوا کے عوام کو صرف بدامنی اور تباہی دی ہے۔