دہشت گردی پر سیکیورٹی کے ساتھ عوامی مسائل کا حل بھی لازمی

گورنر خیبر پختونخوا فیصل کریم کنڈی کی زیر صدارت گورنر ہاؤس پشاور میں صوبائی اپیکس کمیٹی کا اہم اجلاس منعقد ہوا، جس میں وفاقی وزیر داخلہ محسن نقوی، کور کمانڈر پشاور، چیف سیکرٹری، آئی جی پولیس اور ایڈوائزری کونسل کے اراکین نے شرکت کی۔ اجلاس میں صوبے میں پائیدار امن، سیکیورٹی صورتحال اور دہشت گردی کے مکمل خاتمے کے لیے انٹیلی جنس بیسڈ کارروائیاں جاری رکھنے پر اتفاق کیا گیا۔ فورم نے پولیس اور سی ٹی ڈی (CTD) کی عملی استعداد کار بڑھانے کے لیے جدید آلات، مؤثر اسلحہ، نئی گاڑیوں اور بکتر بند گاڑیوں (APCs) سمیت درکار نفری کی فراہمی کی منظوری دی۔ اپیکس کمیٹی نے واضح کیا کہ صوبے میں پائیدار امن اور سیکیورٹی کا براہ راست تعلق تعلیم، صحت اور عوامی معیار زندگی سے ہے جو ماضی میں نظر انداز ہوتا رہا، لہٰذا متاثرہ علاقوں میں بنیادی سہولیات کی فراہمی اور سرکاری خدمات کو عوام کی دہلیز تک پہنچانے کے لیے مقامی تجاویز کی روشنی میں اقدامات کیے جائیں گے۔