انکم ٹیکس گوشواروں میں غلطی پر ایف بی آر کا جرمانے عائد کرنے کا فیصلہ

فیڈرل بورڈ آف ریونیو (ایف بی آر) نے انکم ٹیکس گوشواروں میں غلط معلومات فراہم کرنے، اثاثے چھپانے اور ریکارڈ میں ردوبدل کرنے والے ٹیکس دہندگان کے خلاف سخت جرمانوں اور قانونی کارروائی کا فیصلہ کیا ہے۔ ذرائع کے مطابق ایف بی آر کے پاس ملک بھر میں موجود جائیدادوں اور اثاثوں کا مکمل ڈیٹا دستیاب ہے، جس کا گوشواروں سے موازنہ کرنے اور بے ضابطگیوں کی نشاندہی کے لیے مصنوعی ذہانت (Artificial Intelligence) اور خودکار نظام کی مدد لی جا رہی ہے۔ ذرائع کا کہنا ہے کہ غلط معلومات یا اثاثے چھپانے کی صورت میں تنخواہ دار طبقے پر ان کی تنخواہ کا 75 فیصد تک بھاری جرمانہ اور مقررہ وقت پر ادائیگی نہ کرنے پر روزانہ 1 ہزار روپے اضافی جرمانہ عائد کیا جا سکتا ہے۔ ایف بی آر نے تمام ٹیکس فائلرز کو تنبیہ کی ہے کہ وہ 15 اکتوبر سے قبل اپنے انکم ٹیکس گوشواروں کا ازسرِنو جائزہ لے کر کسی بھی غلطی کی بروقت تصحیح اور درستگی یقینی بنائیں۔