ایمرجنسی قابل مذمت، فیصلے کے خلاف ہر فورم پر آواز اٹھائیں گے: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر خان نے خیبر پختونخوا میں ایمرجنسی کے نفاذ کی شدید الفاظ میں مذمت کرتے ہوئے اس اقدام کو غیر جمہوری اور سنگین سیاسی غلطی قرار دے کر یکسر مسترد کر دیا ہے۔ اپنے ایک تفصیلی بیان میں بیرسٹر گوہر نے کہا کہ صوبائی خودمختاری اور عوامی مینڈیٹ کو نظر انداز کر کے وفاق اور صوبے کے درمیان تصادم پیدا کرنے سے امن قائم نہیں ہو سکتا۔ انہوں نے اس عزم کا اعادہ کیا کہ دہشت گردی کے خاتمے پر کوئی دو رائے نہیں اور اس سے قومی یکجہتی اور مشترکہ حکمتِ عملی ہی سے نمٹا جا سکتا ہے، تاہم طاقت اور غیر معمولی اقدامات کے بجائے آئین کی بالادستی اور بامعنی مذاکرات ہی مسائل کا حل ہیں۔ انہوں نے وفاقی حکومت سے اپیل کی کہ وہ ‘انا’ کو بالائے طاق رکھتے ہوئے اور زمینی حقائق کو سمجھتے ہوئے چند دنوں کے اندر اس فیصلے کو واپس لے، کیونکہ سیاسی فیصلوں پر نظرثانی کمزوری نہیں بلکہ قومی مفاد میں دانش مندی کی علامت ہے۔